Тывада аныяктарның бизнес-төлевилелдерин деткиир грантыже конкурс эгелээн

 Республиканың Аныяктар политиказы болгаш спорт яамызы ТР-ниң Чазааның 300 муң рубль чедир түңнүг грантызынче кордакчыларның конкурузун март 1-де эгелээн. 30 хар четпээн, бизнестиг ийикпе азы ону эгелээр планныг сайгарлыкчылар аңаа киржир. Оон аңгыда биче болгаш ортумак бизнестиг, ажылдакчыларының болгаш удуртукчузунуң хар-назыны 30 хар четпээн, азы компанияның устав капиталында акша салыкчыларының 75 хуузу 30 хар четпээн аныяктардан тургустунган юридиктиг черлер грантыже кордап болур. 

 Конкурс 4 номинациялыг, ооң бирээзинге-ле элээн каш тиилекчилерни илередир. Ооң аразында – төлевилелдиң «стартап» деңнели, азы чаа-ла тургустунган ийикпе, азы юридиктиг чер кылдыр бүрүткедип четтикпээн компаниялар киржир. «Чедиишкинниг старт» деп бөлүктүң киржикчилеринге 6 айдан эвээш эвес ажыл-чорудулгалыг компаниялар хамааржыр. «Социал сайгарлыкчы чорук» номинацияга чурттакчы чоннуң социал айтырыгларынче угланган төлевилелдерни шилиир. Бо чылын чаа-ла ажыл-херээн ажыдарын планнап турар, кандыг-даа арга-дуржулгазы чок аныяктар төлевилелдерин «Кыйгыны салып тур мен» деп номинацияга үнелээр. 

 Конкурсту 3 чадага организастаарын сайыт Юрий Ооржак дыңнаткан. Марттың 1-ден май 15-ге чедир тускай комиссия киржикчилерден чагыгларны база бадылаттынган майыкта долдурган бизнес-төлевилелдерни хүлээп алыр. Ооң соонда, июнь 1-ге чедир, тускай критерийлер-биле бизнес-төлевилелдерге баллдарны салып, конкурстуң төнчү кезээниң киржикчилерин шилиир. Чылдың-на июль төнчүзүнде, «Дүрген» чайгы лагерь территориязында эртип турар «Тыва – хөгжүлдениң девискээри» аныяктар шуулганында, грантыже кордакчыларның төнчү шилилгезин чорудар. Шуулган үезинде, конкурстуң сөөлгү чадазынче эрткен киржикчилер, боттарының бизнес-бодалдарын хөйнүң мурнунга камгалаар. Конкурстуң негелдези езугаар, ооң киржикчилери дилеп турар грант акшазының 20 хуузу хире хемчээлдиг инвестиция салыышкынын төлевилелинче киириштирерин магадылаан документини – банкыда агар санындан ушта бижилгени көргүзер. ТР-ниң Аныяктар яамызы-биле конкурстуң тиилекчилери дугуржулганы чарып, төлевилелиниң күүселдезин квартал санында илеткээр. 

  Грант дээш конкурска киржир күзелдиг аныяктар документилерни дараазында адреске дужаар: Кызыл хоорай, Калинин кудумчузу, бажың 1б, кабинет 201, харылзажыр телефону 8-(39422)-60503.