«Кадыкшылдың маршруду» төлевилел-биле Тываның ыраккы Тожу кожуунунуң чурттакчы чонунуң кадыкшылын шинчээн

 «Кадыкшылдың маршруду» губернатор төлевилели-биле эмчилерниң көжүп чоруур бригадазы ыраккы Тожу кожууннуң Тоора-Хем, Адыр-Кежиг, Ырбан, Ий суурларның чурттакчыларын шинчээн. Бо удаада тускай мергежилдиг эмчилерниң бригадазында фтизиатр, онколог, дерматовенеролог эмчилер немешкен. 

 Ыраккы кожууннуң чурттакчыларындан шинчилге эрткен 356 кижиниң 10-у шуут кадык деп бөлүкте, 38 аарыг кижи хоочураан аарыг болган. Эндоскопист эмчи 47 кижиде аарыгны, УЗИ эмчизи 246 кижиде 414 паталогияларны, кардиолог 338 кижини шинчээш, 125 чүрек-дамыр аарыын илереткен, эндокринолог эмчи 284 кижиден 110 кижи аарыг болганын, офтальмолог 116 кижиден 89 патологияны, отоларинголог 124 кижиден 97 аарыгны тыпкан. Кадыкшыл төвүнүң терапевт эмчизи 189 аарыгларны, 12 семириир аарыгны тодараткан. 

 «Кадыкшыл маршруду» губернатор төлевилелиниң көжүп чоруур бригадазындан нарколог эмчилер кожуунда байдалды база хынаан. Кожуунда наркология кабинединде психиатр биле невролог эмчилер хүлээп алыышкыны чорудуп турары эки. Неделя дургузунда бөлүк наркологтар Тоора-Хем, Ий база Адыр-Кежиг суурлардан 57 кижини шинчээш, оларның 26-зы – херээженнер, наркодиспансерниң немелде учедунга сес кижини тургускан. 

 Наркологтар бөлүү чурттакчы чонну шинчиирден аңгыда, улуг класстарның өөреникчилери-биле ужуражылгаларны эрттирип, наркотиктиг бүдүмелдерниң база араганың хоразының дугайында тайылбыр ажылын чоруткан. Чижээ, наркотиктиг бүдүмелди чаңгыс катап шенеп ажыглааш, ооң салдарындан камгалакчы, полицейжи, шериг дээн ышкаш мергежилдерге өөренир арганы чидирип ап болурун сагындырган. Наркодиспансерниң дыка хөй пациентилери, чаңгыс шил пивону хөөрежип ижиптер-дир дээн бодалдан эгелээш, ам оларның аарыг кижилери апарганын чугаалаан. Өг-бүлезинге арагалаар кижилер-биле беседаны база кылган. 

  Тус чер чагырга даргазының социал политика талазы-биле оралакчызы Д. Кыргыстың удуртканы хуралга эмчилерниң кожуунга ажыл-чорудулганың түңнелдерин сайгарып чугаалашкан.