Дээди Хуралдың даргазының оралакчызы Ирина Самойленко: Россияның Президентизиниң деткимчезин эскерип турар бис

 - Чурттуң Президентизи бистиң республиканың Баштыңы-биле албан езузу-биле азы анаа-даа, удаа-дараа ужуражып турары өөрүнчүг-дүр. 

  Владимир Владимирович Путин бистиң республиканың берге айтырыгларын билип, ону шиитпирлээр дээш деткимчени берип, кичээнгейде алганы дээш өөрүп четтирдивис. Ында, төрээн чери Тываны доктаамал деткип чоруур бистиң чаңгыс чер чурттуувус, камгалал сайыды Сергей Кужугетович Шойгунуң үлүү улуг. 

 Чуртта элээн нарын социал-экономиктиг байдал турза-даа, федералдыг төптен, Пезидентиниң бодундан, Президент Администрациязындан, Россияның Чазаандан дузаны бистиң республиканың ап турары дээрге, Тыва Республиканың Баштыңы Шолбан Валерьевич Кара-оолдуң база ооң командазының, республиканың хөгжүлдези дээш, күжениишкинниг ажыл-чорудулгазы деп үнелээр апаар. 

 Медээлерде дыңнатканы ышкаш, чүгле көдээ ажыл-агыйында губернатор төлевилелдери боттанып турар эвес, аңгы-аңгы адырлар: өөредилге, спорт, кадык камгалалында база бар. Ол бүгү социал адырны экижидеринге эки талаларлыг. Шолбан Валерьевич Кара-оол республиканың чидиг айтырыгларын ыыт чок эрттирбейн, ону шиитпирлээрде деткимчени алыры-биле, Президентиге дыңнатканы дыка эки болду.