Тываның Улустуң хөөмейжизи Игорь Көшкендей: Тываның Чазааның күжениишкинин Россияның Президентизи деткип турары илдең-дир

 Игорь Көшкендей, Тываның Улустуң хөөмейжизи: 

 - В.В. Путин биле Ш.В. Кара-оолдуң ужуражыышкынын федералдыг телеканалдарның медээлеринден бүгү Тыва көрген боор деп бодап тур мен. Бистиң республикавыс Баштыңының республикада социал-экономиктиг байдал дугайында дыңнадыын чурттуң Пезидентизи кончуг кичээнгейлиг болгаш сонуургап дыңнап орарын бодум хуумда эскердим.

 Республика Баштыңының болгаш Чазааның, регион инвесторларынга таарымчалыг болзун дээш үндүрүп турар бүгү-ле күжениишкиннерин Президент үнелеп, чаа эгелээшкиннерни, эң ылаңгыя тус черниң байдалын, чурттакчыларының ажыл-ижиниң онзагайын барымдаалап, ажылдап кылган төлевилелдерни деткип турары илдең болду. Чижээлээрге, ажыл-хожулун чаа эгелээн малчыннарны деткээн «Аныяк өг-бүлеге – кыштаг» деп төлевилелди Шолбан Валерьевич Президентиге таныштырды, бистиң республикавыстың кол ооргазы мал ажылын улам сайзырадырынга идиг боор дээрзинге бүзүрээр мен.