Тываның Баштыңы Роскызыгаар-биле «Хандагайты — Боршоо» кызыгаар эрттирилге пунктузун чаартып кылыр дугайында дугурушкан

 Тывада «Хандагайты — Боршоо» автомобиль эрттирер кызыгаар пунктузун чаартып кылырының хемчеглерин 2016 чылдың программазынче РФ-тиң Күрүне кызыгаарынга ажылдар кылырының талазы-биле федералдыг агентилел киирип алган.

 Ындыг дугуржулганы Тываның Баштыңы Шолбан Кара-оол Роскызыгаарның удуртукчузу Константин Бусыгин-биле январь 29-та Москвага болган ужуражылга үезинде кылган. Төлевилел-смета документациязын ажылдап кылырын бо чылын доозары, ооң соонда объектини чаартырынче кирери планнаттынып турар. 

 Хандагайты — Боршоо кызыгаар пунктузунга хөй талалыг деп эрге-байдалды тыпсырының дугайында шиитпирни 2007 чылда хүлээп алган. «Хандагайты» контроль-хыналда пунктузунда байдалды чаартырынга Тываның Баштыңының «Енисей» М-54 федералдыг оруктуң угланыышкынын өскертириниң дугайында федералдыг Чазактың шиитпирин чедип алганы улуг идиглиг болган. 

 Ол оруктуң чаа угланыышкынын 2015 чылдың күзүнүнде «Цагаан-Тологой» кызыгаар пунктузундан «Хандагайты – Боршоо» пунктузунче албан-езузу-биле шилчиткен. Ол орук дээрге Моолдуң орук четкилеринче киреринге чоок болгаш Россия биле Азия – Оожум океан девискээрлериниң аразынга кызыгаар чоогунуң транспорт аргыштырылгазынга чугула өзек болур.