2015 чылдың түңнелдери-биле Тываның Баштыңы Шолбан Кара-оол Губернаторларның национал рейтинг бөлүүнде ийиги черже үнген

 Россияның регионнарының удуртукчуларының 2015 чылда ажыл-чорудулгазын шинчилээниниң түңнелдерин информастыг технологияларның «Рейтинг» төвү чарлаан.

 Информастыг технологияларның бо төвүнүң эрттирген шинчилелдери езугаар Тыва Республиканың Баштыңы – Чазааның Даргазы Шолбан Кара-оолдуң российжи эрге-чагыргада политиктиг туружу эрткен чылдыындан элээн быжыккан деп болур. «Рейтинг» төп Тываның удуртукчузу Россияның регионнарының удуртукчуларының үшкү бөлүүнге хамаарыштырып турар. 2014 чылда бо бөлүкке Шолбан Кара-оол ажыл-чорудулгазында чедиишкиннери-биле 65-ки черге турган. Бо чылын 59-ку черни ээлей берген.

  Сибирьниң губернаторларының ийиги бөлүүнче Тываның Баштыңы Хакас Республиканың, Томск, Иркутск болгаш Омск областарның удуртукчулары-биле кады кирген. 

 Информастыг технологияларның «Рейтинг» төвү Россияның регионнарының удуртукчуларының ажыл-чорудулгазын шинчилээринге болгаш түңнелдерни үндүреринге чонга билдингир болгаш хөй-ниитиге билдинмес информацияларны ажыглап турарлар. Ынчалза-даа аңаа регионнар болгаш федералдыг деңнелдиң эксперттериниң үнелелдерин база улуг кичээнгейге ап турар болгаш, губернаторларның рейтингизин тодарадырынга оларның хамаарылгазы база дыка улуг салдарлыг.