Тыва көдээ черде сыдым байырлалын республика деңнелинче көдүрер

 Республиканың баштыңы Шолбан Кара-оол, Тес-Хем кожуунга ажыл-агыйжы сургакчылаашкын соонда, ындыг саналды идип үндүрген. Сыдым байырлалында школачылар аъттың дериин кылырга мөөрейлежирлер. 

 «Ак-Эрик суурда сыдым байырлалы бистиң өгбелеривистиң дугайында лекциялардан 1000 катап дээштиг-дир. Тус черниң улусчу мастери Кур-Дагба Ланаа бурунгу болгаш ажыктыг билиглерни оолдарга дамчыдып, херек кырында канчаар кылырын холу-биле тудуп өөредип турар. Ол көдээ ишчиниң байырлалы келир чылын Тывада чарлаан Хүндүлээчел Тываның чылынга дүүшкек, ынчангаш ону баштай кожуун иштинге, оон республика деңнелинге эрттирер» - деп Шолбан Кара-оол чугаалаан. 

 Ак-Эрик суурнуң шупту оолдары школада улусчу ус-шевер Кур-Дагба Ланааның удуртканы «Чылгычы» бөлгүмде хостуг үезин эрттирип турар. Олар шупту сыдымның ужур-утказын, мал ажылынга ооң ажыын, хөмден ону канчаар кылырын билирлер. Бодундан улуг эр кижини Ак-Эрикте «акаа» деп адаар. Оолдарны бичиизинден эр мөзү-бүдүшке, онза харыысалгага, кижизиг чугаа-соотка кижизидери – хажыттынмас чаңчыл. 

 Көдээ черниң школазы үш дугаар чыл сыдым байырлалын эрттирип турар. Кижизидикчи утка-шынарлыг бо байырлалды өске черлерге база эрттирер ужурлуг деп Тываның Баштыңының санааны чөп.