Тывада хайгаарал органнарынга хамаарыштыр чажыт хомудал дептерин сайгарлыкчыларга ажыткан

 Тываның Экономика яамызы сайгарлыкчыларга «Хыналда болгаш хайгаарал органнарының артык болгаш шынар чок хөделиишкиннери бо» деп акцияны эгелээн. Хыналда болгаш хайгаарал органнарының талазындан сайгарлыкчыларга таарымча чок хөделиишкиннерни илередири-биле ону чорудуп турар. Акцияга киржирде Сайгарлыкчы чорук департаментизинде бижимелдер кезээнче киргеш, «сагындырыг, хомудал, санал-онал»  айтыгда медээ бижиир черде, тускай майыкка бодунуң хомудалын бижиир. 

 Акция чажыт байдалда эртер. Программа бижээн чүүлдү хүлээп алыр кылдыр, "ФИО", "адрес", "телефон", "хомудалдың темазы" деп майыкта хос черлерге "анонимно" деп демдеглээр, а "электроннуг почтаның адрези" дээн черге яамының - mineconom@tuva.ru хааржаан айтыр. Оон сөзүглел бижиир черге, авторнуң бодалы-биле, болдунар болза, хоойлулар болгаш өске-даа нормативтиг актыларны айытпышаан, бизнести базып турарының дугайында хомудалын азы санал-оналын дамчыдар. 

  Сайгарлыкчы чорук хөгжүлдезинде элээн чидиг айтырыгларны, эрге-чагырга база хыналда-хайгаарал органнары-биле оларның хамаарылгазының «аарышкылыг точкаларын» илередир дээн, республика Баштыңы Шолбан Кара-оолдуң даалгазы-биле, ону чорудуп турарын экономика сайыды Елена Каратаева чугаалаан. Бо акция административтиг шаптараазыннарны илередип, артык-ла хайгааралдарны чавырылдар ийикпе, азы өске аргаларын тывар ужурлуг.