Владимир Путин Тывадан экскаватор машинизи Хапыр-оол Ооржакты Хүндүлел ордени-биле шаңнаан

 Конституция хүнүнүң бүдүүзүнде, Кремльге, күрүне шаңналдарын тыпсырының байырлыг езулалы болган. 40 хире кижи ону Россияның президентизи Владимир Путинден алганнар. Кинорежиссер Никита Михалков, Эстрада театрының уран чүүл удуртукчузу Геннадий Хазанов, Биче театрның уран чүүл удуртукчузу Юрий Соломин «Ада-чурттуң мурнунга ачы-хавыяазы» орденниң I чергезиниң лауреаттары болганнар. 

 Александр Невский орденин академик Жорес Алферов, кардиохирург Лео Бокерия база опера ыраажызы Дмитрий Хворостовскийге тывыскан. Ыраажылар болгаш композиторлар Юрий Антонов биле Дмитрий Маликов күрүне баштыңындан Найырал орденин алганнар.

 Шаңнатканнарның аразында чүгле билдингир кижилер эвес, а бөдүүн российжилер база бар. Тывадан экскаватор машинизи Хапыр-оол Ооржак база Волгоград облазындан Алексей Боягисов Хүндүлел орденинге төлептиг болганнар. 

 Тываның даг-руда компаниязының экскаватор башкарыкчызы Хапыр-оол Амыр-Ашакович Каа-Хем уургайында ооң ажыттынган хүнүнден – 1970 чылдың октябрь 27-ден бээр ажылдап турар. Ооң күш-ажыл стажы 45 чыл.