Тываның Баштыңы шынар чок пандустарлыг объектилерни хүлээп албазын негээн

 Тываның Баштыңы Шолбан Кара-оол оралакчызы - тудуг сайыды Александр Свинцов-биле ажыл-агыйжы ужуражылга үезинде амгы болгаш туттунуп турар объектилер талазы-биле бюджет эдилгелерин сайгарганнар. Чугаа үезинде төлевилелдерге бичии уруглар болгаш кызыгаарлаттынган арга-шинектиг кижилерни идер тергелерге пандустарны тударының чугулазынче онза кичээнгейни углаарын айыткан. 

 «Пандустар-биле айтырыгны контрольга алырын силерден дилээр-дир мен. Бир эвес төлевилелде көрдүнген болза, ону шынарлыг кылдыр тудар херек. Чүгле бар аттыг кылган херээ чок, ол кижилерге херек чүүл-дүр. Чаңгыс-даа коляска үнүп шыдавас пандустуң акшазын өскээр шиңгээдип болбас. Тудугжулар-биле чугаалажып, шыйып берип, хыналдага алыңар, силерниң негелдеңер-биле оран-саваларда шынарлыг пандустар кылдынмаан болза, объектини хүлээп албас» - деп Шолбан Кара-оол чугаалаан.