Тываның Баштыңы терроризмге удур хемчеглерни албан күүседирин негээн

 Регионнуң территориязында терроризмге удур хемчеглерни хажыт чок күүседир сорулганы чогуур структураларның мурнунга республиканың баштыңы салган.

 «Бо хүннүң кыйгылары бүгүдеге билдингир. Ооң дугайында федералдыг МИЧ-терде, аналитиктиг материалдарда калбаа-биле сайгарып турар. Неделя санында үнер француз сатириктиг «Шарли Эбдо» солуннуң ажыл-чорудулгазын, шажын темазынга карикатура парлааш, коргунчуг терактыга таварышкан ажылдакчыларның дугайын сайгарып турар. Ындыг болзажок, ол оларга кичээл болбаан. Террорисчи актыдан мөчээн боттарының коллегалары дээш сагыш-човаашкын оларда чок болган. Синайга самолет-биле болган Россияның кажыыдалы оларга бичии-даа кээргел сеткилди болдурбаан. 

 Бистиң чуртувус терроризм-биле демиселге быжыг турушту ээлеп турар болгаш ээлээр-даа. Кавказка-даа ындыг турган, ам Сирияда. Российжи самолет-биле авиакатастрофага «Шарли Эбдо» солуннуң карикатуразы база чамдык күрүнелерниң туружу – ол дорт кыжаныышкыннар-дыр. Россияны коргудуп, күткүүшкүннү чорудар бодап турарлар. Ынчангаш терроризмге удур хемчеглерни ыяап-ла күүседир херек. Суларап болбас. Ылаңгыя социал албан черлеринге, хөй кижилер чыылган черлерге, амыдырал-хандырылга объектилеринге. Бүгү-ле болуп турар чүүлдерден ыракта чурттап турар бис деп бодаваңар. Шупту чүве контрольга турар ужурлуг» - деп Шолбан Кара-оол чугаалаан.