Тываның чедери берге Тере-Хөл кожууннуң чурттакчыларын «Кадыкшыл маршруду» төлевилели-биле шинчээн

 Тускай мергежилдиг эмчилерниң бригадазы үнүүшкүннүг маршрут-биле ыраккы болгаш чедери берге Тере-Хөл кожуунну эргээн. Кунгуртуг суурнуң чурттакчылары кардиолог, эндоскопист, офтальмолог, отоларинголог, онколог, эндокринолог, невролог, гинеколог, терапевт база УЗИ эмчизинге шинчиткеннер. 

 Бир чартык чыл бурунгаар эгелээн «Кадыкшылдың маршруду» губернатор төлевилели ыраккы кожууннарда болгаш көдээ черлерде чурттакчы чонга үе шаанда эмчи шинчилгезин эрттирип, аарыгларны үезинде илередип турары улуг идиглиг дээрзин сагындыраал. «Кадыкшыл маршруду» төлевилел республиканың бүгү булуңнарынга четкен деп болур. Бо чылын «Кадык суур» төлевилел чорудуу-биле кады «Кадыкшылдың маршруду» база дыка хөй суурларның чурттакчыларын шинчип, чамдык кижилерге немелде шинчилге болгаш бедик технологтуг медицина дузазын немей эртер кылдыр бижиктерни берген. 

 Кунгуртугга шинчилге үезинде УЗИ эмчизи 195 кижини шинчээн, онкологтуң хүлээп алыышкынынга - 130, офтальмологка – 129, терапевке – 120, отоларингологка – 115, кардиологка – 109 кижи кирген. Кардиолог эмчи бир кижиге республиканың эмнелге албан черинге немелде шинчилгени эртер бижикти берген, 42 кижиниң ханының базыышкыны улуг, хан-дамыр аарыг, төрүмелинден чүрээ кемниг дээш өске-даа чүрек-биле холбаалыг аарыглар бары илереттинген. Отоларинголог эмчиден 33 кижи немелде шинчилгеже, ийи кижи чыдып эмнедир, 13 кижи амбулаторлуг эмнээшкинни эртер бижикти алган. Дөрт херээженге чыдып эмнедирин, 64 кижиге – немелде шинчилге эртерин, ийи кижиге бедик технологтуг эмчи дузазы алырын гинеколог эмчи сүмелээн.

  Терапевт эмчи артык килдиг, шын чемненмес, шимченгир эвес, арага хөй ижер база ханының базыышкыны улуг кижилер хөй деп түңнелди үндүрген.