Тывада көдээ ажыл-агый культураларының дүжүдүнүң түңнелдерин үндүрген

 Чайгы изиг хүннер дүжүт ажаалдазының көргүзүглеринге салдарны чедирген. Регион чергелиг онза байдал үезинде 15 муниципалдыг тургузугларда көдээ ажыл-агый культуралары когараан: тараа болгаш мал чеминиң культураларын тараан шөлдерниң 50 ажыг хуузу кааңнаашкындан кадып, кургаан. Кааңнаашкынның уржуктарын чайладыр дээш Тываның Чазаа регион деңнелдиг хемчеглерни ап чоруткан. Тываның Баштыңы Шолбан Кара-оол эрге-чагырганың шупту органнарының мурнунга тараа ажаалдазынче болгаш мал чеминиң белеткелинче бүгү күштерни мөөңнээрин, малчын бүрзүнге чедип, чогуур дузаны чедирер даалганы берген. 

 ТР-ниң Көдээ ажыл-агый яамызының медээзи-биле алырга, 1,5 муң га тараа шөлүнден дүжүттү ажаап алган. Эрткен чылга деңнээрге дүжүт эвээш. Ниитизи-биле 0,61 муң тонна тараа, 0,32 муң тонна ак-тараа, 0,15 тонна сула, 0,023 муң тонна чиңге-тараа дүжүдүн алган. 7,1 муң га черде мал чеминиң культураларының дүжүт ажаалдазы доозулган. Сүт-Хөл кожуунда 0,2 муң га шөлде дүжүт арткан. Тараан сигенниң дүжүдү 6,8 муң тонна болуп, бир гадан 9,5 центнер дүжүттү алган. 

 Тываның Көдээ ажыл-агый яамызы мал чеми белеткээр кампанияның түңнелин база үндүрген. Көдээ ажыл-агый специалистериниң бодалы-биле алырга, чайгаар үнген сигенни кезип белеткээр дээш муниципалдыг тургузуглар чурттакчы чонну, көдээ ажыл-агыйларын болгаш улуг бүдүрүлгелерни хаара тудуп, күжениишкинниг ажылдаан. Октябрьның бирги он хонуунга чедир 169,6 муң га шөлдүң сигенин кескен, ооң 165,4 муң газында сигенни бөлген, планныг онаалданы 99,9 хуу күүседип, 153,055 муң тонна мал чемин белеткээн. «Каа-Хем» МУБ 0,109 муң тонна чулуктуг чемни курлавырлаан. Ниитизи-биле 70,9 муң тонна хоолуг чем белеткеттинген. Бир баш малга онааштыр 2,1 центр мал чеми, азы хереглелдиң 91,3 хуузу белеткеттинген.

 Республиканың ажыл-агыйлары 3,5 муң га шөлде картофельди ажаагаш, 32,7 муң тонна дүжүттү алган, бир гадан 93 центнер. «Огородтуң делгеминде – чоннуң кадыкшылы» губернатор эгелээшкининиң ажыл-чорудулгазында 18 муниципалдыг тургузугда 1466 орулгазы эвээш болгаш хөй ажы-төлдүг өг-бүлелер ниити хемчээли 177,6 тонна картофель дүжүдүн алган. Ногаа аймааның дүжүдү 6,3 муң тонна болган (2014 чылда 6,9 муң тонна), бир гадан 114 центнер дүжүт (2014 чылда – гадан 116 центнер). Дүжүттүң ниити хемчээлиниң элээн хөй кезиинде капуста, морковь, помидор, огурец болгаш свекла кирип турар. 

 Ажаалда кампаниязын эрттиреринге 4,7 млн. рубльдиң 106 тонна кывар-чаар материалды ажыглаан, 71 санныг техниканы киириштирген, ооң иштинде тараа ажаар комбайн – 61, мал чемин ажаар комбайн – 6, картофель чыыр комбайн – 4.