Тываның Баштыңы Шолбан Кара-оол сөзүн ээлээн: Шекпээр сумунуң аныяк малчыннарының ажы-төлүнге уруглар сады туттунган
12.10.2015
2014 чылдың январьда республиканың баштыңы Шолбан Кара-оол Каткылыг деп черде муңчу малчын, 2013 чылдың тулган чылгычызы Улар-оол Ооржактың кыштаанга малчыннар-биле ужурашкан.
Ынчан Тываның Чазааның даргазы-биле ужуражыр дээш Шекпээр суурну долгандыр турумчуп, 11 муң ажыг малды тудуп турар он дөрт фермер ажыл-агыйларының баштыңнары чыглып келген. Оларның ийизи муңчу малчын, артканнары база-ла бут кырында быжыг туруп келген малчыннар болган. Ол ужуражылгада элээн шыырак муңчу малчыннарның баазазынга көдээ ажыл-агый продукциязын болбаазырадыр бүдүрүлгени тургузарын сайгарып чугаалашканнар.
Чыыш соонда малчыннар республиканың баштыңы Шолбан Кара-оолга каш дилегни киирген. Кыжын кыштагларже суг сөөртүр машинаны аңгалып бээрин дилээннер. Ол дилегни республика баштыңы ол-ла чылда боттандырган: РФ-тиң камгалал яамызының үндүр бижээни тускай техниказындан суг дажыыр автомашинаны аңгылап берген.
Ажы-төлү дээш мал ажылындан чоруп турарлар база барын өөренип көргеш, эгелеп чоруур фермерлерниң ажы-төлүнге интернат хевирлиг уруглар садын организастаар дугайында айтырыгны чугаалашканнар. Республика баштыңы уруглар садының айтырыын шиитпирлээр айтырыгны кызыдарын, а малчыннар суурнуң экономиказын экижидер дээш үре-түңнелдиг ажылдаарын дугурушканнар.
Шолбан Кара-оол бодунуң сөзүнге ээ болган: Шекпээр суурнуң аныяк малчыннарының 45 уругларынга хондур-хүнзедир турар уруглар сады туттунган. Ооң байырлыг ажыдыышкыны октябрь 9-та болган. Тываның Баштыңы Барыын-Хемчик кожуунга ажыл-агыйжы сургакчылаашкын үезинде Шекпээр суурга чедип, тус черниң чурттакчыларынга өөрүшкүлүг болуушкун-биле байырны чедирген. Уруглар садының коллективи чаштарга чогуур кижизидилге болгаш өөредилгени чорудуп, бүгү талазы-биле сайзырап мандыырынга бар-ла аргалар-биле ажылдаарын республиканың баштыңынга аазаан.
Возврат к списку
|