Тывада чиик үлетпүрнүң айтырыгларын сайгарган

 Тыва Республиканың Экономика яамызы чиик үлетпүр адырында биче болгаш ортумак бизнестиң төлээлерин болгаш бүдүрүлгелерин «Тыва Республиканың ус-шеверлел палатазы» коммерцияга хамаарышпас эштежилгеде кирип турар «Тыва Республиканың дизайнерлер болгаш дарааныкчылар эвилелиниң» хуралынче чалаан. 

  Аңаа Тыва Республиканың Культура яамызы, Тыва Республика талазы-биле федералдыг үндүрүг албаны, Тыва Республиканың Экономика яамызында Сайгарлыкчы чорук департаментизи, муниципалдыг тургузугларның чагыргалары, чиик үлүтпүрнүң бүдүрүлгелери болгаш республикада биче болгаш ортумак сайгарлыкчы чоруктуң субъектилери база киришкен. 

 Тыва Республиканың чиик үлептүрү-биле холбашкан ажыл-чорудулгалыг бүдүрүлгелерниң болгаш сайгарлыкчы субъектилерниң айтырыгларын сайгарып, 2016 чылда Тыва Республиканың дизайнерлер болгаш дарааныкчылар эвилелиниң ажыл планын чугаалашкан.

  Хурал үезинде Тыва Республиканың дизайнерлер болгаш дарааныкчылар эвилелиниң 2015 чылда ажылының түңнелин үндүрген. Ол ышкаш Тыва Республиканың дизайнерлер болгаш дарааныкчылар эвилелиниң баштаар чериниң кежигүннерин соңгуп, бадылааннар. Тус черниң бараан бүдүрүкчүлерниң продукциязын күрүне болгаш муниципалдыг чагыглар күүселдезин хандырарынче киириштирерин база сайгарганнар. 

  Хуу сайгарлыкчы бооп бир дугаар бүрүткеткеннерге Тыва Республикада үндүрүг дыштанылгазын кииргениниң, үндүрүг онаалдазының бөдүүнчүткен база патент системаларының дугайында аңгы тайылбырларны берген.