ТЫВАНЫҢ БАШТЫҢЫ РЕГИОНГА ЧАА ШКОЛАЛАР ТУДУУ БОЛГАШ НАЗЫ ЧЕТПЭЭН ӨӨРЕДИЛГЕ АЛБАН ЧЕРЛЕРИНИҢ ЧЕДИНГИРИНИҢ АЙТЫРЫГЛАРЫН РОССИЯНЫҢ ӨӨРЕДИЛГЕ ЯАМЫЗЫНГА КӨДҮРГЕН

 Тываның Баштыңы Шолбан Кара-оол Москвага ээлчеглиг сургакчылаашкын үезинде Россияның өөредилге болгаш эртем сайыды Дмитрий Ливанов-биле ужурашкан. Регионнуң удуртукчузу Тывада чаа школалар тудуглары болгаш назы четпээн өөредилге черлериниң чедингириниң айтырыгларын көдүрген. 

  «Чаа өөредилге чылында республикада назы четпээн өөредилге албан черлеринде 18 муң хире уругну хаара туткан. Федералдыг күрүнениң өөредилге стандарттарының негелделеринге дүүшкен амгы үениң уруглар садтарында оларның 1,5 муң ажыы барып турар. Ындыг болзажок, уругларны назы четпээн өредилге албан черлеринче хаара тударының айтырыы ам-даа чедир шиитпирлеттинмээн» – деп, Тываның Баштыңы демдеглээн. 

  2015 чылдың «орук картазы» езугаар назы четпээн өөредилге албан черлери-биле хандырарынга федералдыг болгаш регион акшаландырыышкыны-биле 4014 олутту киирери көрдүнген деп, республиканың Баштыңы Шолбан Кара-оол дыңнаткан. Уруглар садынче оочурда турарларның саны хөй: 1 хардан 3 харга чедир – 3,5 муң ажыг, 3-ден 7 харга чедир – 4 муң ажыг. 

 «Чаштарның төрүттүнериниң хөй чоруу 3-ден 7 харга чедир уругларны назы четпээн өөредилгеже чүс хуу хаара тударынга салдарны чедирип турар. 2016 чылдың январь 1-ге чедир назы четпээн уруглар албан черинге уругларны 100 хуу хаара тудар план 89 ажыг хуу болур» - деп Шолбан Кара-оол демдеглээн.

  Республиканың Баштыңы назы четпээн өөредилге албан черлериниң регион системазын модернизастап, 980 олутту ам-даа кииреринге, немелде акшаландырыышкынны бээрин дилээн. Чаа уруглар садтарын демографтыг байдалды көрүп, эге школалар кылдыр база ажыглап болур. 

  База ол ышкаш Шолбан Кара-оол Тываның девискээринге чаа, ылаңгыя коррекциялыг школа тудуунга, хереглелди демдеглеп, «РФ-тиң субъектилеринге ниити өөредилге организацияларынга чаа олуттарны тургузарынга деткимче» программаже Тыва Республиканы киирерин, 2016 чылда республиканың девискээринге амгы үениң алды школазының тудуунга федерелдыг деткимчени көргүзерин саналдаан. Оон аңгыда, республиканың Баштыңы Тываның күрүне университединиң студентилеринге 420 оруннуг чаа ниити чуртталга бажыңының тудуу чугула херек дээрзин айыткан.

 Россияның өөредилге болгаш эртем сайыды Дмитрий Ливанов республика Баштыңы Шолбан Кара-оолдуң айыткан айтырыгларын сайгарып көөрүн, регионче ооң чалалгазы езугаар албан келирин дыңнаткан.