Олег Ястребов: Тываның кол ылгавыр демдээ – экологиязы. Ындыг бойдус чурумал-биле бир дугаар таварыштым

 Олег ЯСТРЕБОВ – шуулганның хүндүлүг аалчызы, эксперт, Россияның Улустарның найыралы университеттиң Юридиктиг институдунуң директору, профессор. 

 - Олег Александрович, «Евразияның интеллектуалдыг алдыны» аныяктар шуулганында Европа биле Азияның интеграциязының дугайында дыка хөйнү чугаалап турар. Ол болдунар деп санаар силер бе? Европаның чурттары-биле хамаарылгавыс элээн кызыы апарган болгай. Азия чурттары-биле билчилгевис эки. 

 - Ол шупту түр үении дээрзин билир силер. Каттышкан нациялар организациязының уставының эге кезээнде чурттар эки кожалар бооп чурттаар ужурлуг деп бижээн. Түр үениң бергедээшкиннери бар-даа болза, аныяктар чоокшулажып, культура, спорт, эртем болгаш чоннар аразының харылзаазын сайзырадыры чугула. Бо бүгү эртип, эки кожалар бооп, чурттай бээривиске бүзүрээр мен. 

  - РУНУ-нуң Юридиктиг институдун башкарып турар болгай силер, аныяк кижилерге эргелерин билири кайы хире чугулал? 

 - Билир силер бе, юридиктиг чепсегленген аныяктар келир үелиг дээрзинге бүзүрээр мен. Ол дыка кол. Кажан аныяк кижи эргелерин билбес болза, ооң кылбас чүвезин безин кылыр кылдыр албадаптары, амыр. Азы ооң алыр ужурлуг чүүлүн бербейн барып болур. Хүлээп алыышкын комиссиязынга аныяк кижилер эргелерин, чиигелделерин билбес болурун бо-ла көөр мен. Дыка хөй кижилер халас кирип, немелде баллдар ап болур. А олар ону билбес. Ынчангаш эрге-хоойлу талазы-биле эге өөредилгени школага-ла бээр ужурлуг деп санаар мен. Ынчан келир үе оларда. 

 - «Евразияның интеллектуалдыг алдыны» аныяктар шуулганынга хамаарыштар силерниң бодалыңар?

 - Тулган ажыл, тулган шуулган. Республиканың Баштыңынга, РУНУ-нуң юридиктиг институдунуң доозукчузу Оксана Белоконьга улуу-биле четтирдивис. Шөлчүгештерде ажылдар чымыштыг, ханы дискуссиялар чоруп турар, хемчегни организастааны эки-дир. Шуулганны херии базымныг келир үе манап турарынга бүзүрээр мен.

 - Бөгүн залга солун айтырыг көдүрүлдү. Тыва Республикага Силер кандыг ылгавыр демдек бодап алдыңар? 

 - Экология. Чер кырында дыка солун черлер хөй, ынчалза-даа мындыг бойдус-чурумалдыг чер-биле бир дугаар таварыштым.