Новосибирскиде тыва студентилер "Кадык чуртталга" деп конференцияны эрттирген

Новосибирск областың библиотеказынга апрель 7-де Новосибирск хоорайда Тыва чурттуг аныяктарның болгаш студентилерниң «Идегел» ниитилелиниң «Кадык чуртталга» деп конференциязы болган.
   Конференцияның кол сорулгазы – аныяк оолдар, уругларны амыдыралдың кадыкшылдыг овур-хевиринге хаара тудары.
   Сибирьниң Күрүнениң башкарылга болгаш экономика университединиң бешки курузунуң студентизи, «Идегел» ниитилелдиң менеджери Айгулья Сандан «Кадыкшылга-аянныг хевир-сын» деп, Новосибирскиниң Күрүне университединиң дөрткү курсчузу, шүлүктерниң болгаш чагааларның «Магалыг элээр делегей» деп конкурузунуң организакчызы Бойду Ондар «Кадыкшылдың сорулгазы» деп, Новосибирскиниң Күрүнениң техниктиг университединиң 4-кү курузунуң студентизи, «Кыстың бүдүжү» деп клубтуң даргазы Роланда Ооржак «Кадык өг-бүле» деп илеткелдерни номчааннар. Конференцияга ниитизи-биле сес илеткелди номчааш, сайгарып чугаалашкан.
  Новосибирск хоорайның аңгы-аңгы өөредилге черлеринден чыылган студентилер, башкылар, Новосибирск областың библиотеказының номчукчулары болгаш ажылдакчылары конференцияга чугаалашкан айтырыгларның чидиин, аныяктарга ажыктыын демдеглээннер.
   Конференцияны Новосибирскиниң Күрүнениң медицина университединиң алдыгы курузунуң студентизи, «Jff-Line» төлевилелдиң удуртукчузу Чойгана Монгуш организастап эрттирген.

Шаңгыр-оол Монгуш.