Тываның Баштыңы Барри Керзинниң лекцияларынга киришкен

 Буддийжи лама, Ыдыктыг Далай-Ламаның эмчизи, «Медицинада альтуризм» институду бүгү делегей организациязының президентизи Барри Керзинниң чырыдыышкын ажылы Тывада уламчылап турар. Россияның буддийжи республикаларында билдингир башкы Тываның күрүне университединиң, башкы болгаш эмчи колледжизиниң башкыларынга, студентилеринге болгаш сургуулдарынга лекцияларны номчаан. 

 Сентябрь 7-ден 9 хүннеринде Улусчу чогаадылга бажыңынга чонга лекцияларны номчаан. Хүндүлүг Барри Керзин найысылалдың чурттакчыларынга кижиниң аас-кежииниң чугула байдалын тургузуп турар кээргээчел чорукка хамаарыштыр чугааны чоруткан. Өш-өжээн, көөр хөөн чок чорук, адааргал чуртталгада бергедээшкиннерниң үндезинин тургузуп, багай бодалдар болгаш бак сагыш кадыкшылды баксырадып турар, оларны канчап чок кылырыл, ынакшылдың ачызы-биле бодун болгаш долгандыр кижилерни канчаар өскертирил дээш, оон-даа өске айтырыгларны шажын өөредииниң улуг башкызы лекцияның дыңнакчылары-биле сайгарган. 

 Улусчу чогадылга бажыңынга буддийжи өөредилгеде чон долдур чыглып келген, Барри Керзинниң сөстеринге болгаш айтырыгларынга сагыш сеткилинден улуг бүзүрел-биле харыылааннар. Лекцияның дыңнакчылары, оларның аразында Тываның Баштыңы Шолбан Кара-оол боттарының сонуургап чорууру айтырыгларын салыр аргалыг болган: эки карманы чедип алырының оруктары, аас-кежик, кадыкшылды камнаары, медитация үезинде канчаар алдынарыл дээш оон-даа өске. Буддизм өөредииниң дыка хөй талалакчыларының болгаш өөреникчилериниң билиглери ханылаанын, оларның салып турар айтырыглары херечилеп турарын, ыдыктыг Далай-Ламаның эмчизин чаңгыс эвес удаа Тывада үдеп чоруур Буян башкы демдеглээн. 

 Ажык лекцияның соонда Тываның Баштыңы эмчи болгаш шажын ажылдакчызы, хүндүткелдиг Барри Керзин-биле аяк шайны аартап, чугаалашкан. Тывага башкының келгени, республиканың чонунга чырыдыышкын ажылы, буддийжи өөредилгени чедингир, билдингир дыл-биле тайылбырлааны база Тываның чонунга ынакшылы дээш Шолбан Кара-оол өөрүп четтиргенин илереткен. Тываның Баштыңы биле Барри Керзин буддийжи өөредилгениң болгаш философияның чамдык дүрүмнерин сайгарган: кижи бүрүзүнүң чуртталгазында карманың дугую эрткен эвес, а амгы үеде кылдыныгларындан кол хамааржыр. Кижиниң, чоннуң, кижи төрелгетенниң келир үези бөгүнден хамаарылгалыг. Шолбан Кара-оол Барри Керзинге чырыдыышкын ажыл-чорудулгазы дээш үнелел кылдыр тураскаалдыг суй-белек – тыва аян-биле сиилбээн ийи аяк биле эм оъттардан тыва шайлыг хапты сөңнээн. 

  Барри Керзин Ыдыктыг Далай-ламаның Россияда, Моолда болгаш ХКД чурттарында төлээзи Тэло Тулку Ринпоче база «Тибетти кадагалаалыңар» фондунуң чалааны-биле Тывада келген. Ыдыктыг XIV Далай-ламаның сүмелээни сураглыг буддийжи башкылар болгаш лекторларны Россияже чалаар талазы-биле Тэло Тулку Ринпоче башкының чорудуп турар программазы-биле буддийжи регионнарда келир салгалдарга ажылдаары-биле Россияда улуг башкының келгени ол. Барри Керзин Россияга бир-ле дугаар 2010 чылдың күзүн келген.

 Буддийжи башкының солуттунмас очулдурукчузу Юлия Жиронкинаның материалдары-биле алырга, делегейде биддийжилерниң шажын лидерин Россияга кээрин болгаш Тываның күрүне университединден өөрүп четтириишкин чагаазын 2011 чылдың декабрьда Барри Керзин дамчыткан. Ында Тываның дээди болгаш ортумак өөредилге черлеринге Барри Керзин докторнуң лекцияларынга бедик үнелелди берген. 

 Барри Керзин Дхарамсалада (Индия) чээрби ажыг чыл чурттап, улуг лама башкыларга профессионал эмчи дузазын көргүзеринден аңгыда, бөдүүн чонга база дузалап турар. Бодунуң ажыл-чорудулгазында буддийжи медитацияның хөй чыл арга-дуржулгазы биле барыын чүк эртеминиң билиглерин деңге ажыглап турар. Кижиниң сагыш-сеткил-мага-бот кадыкшылында угаан-медерел хосталгазының практиказының салдарын шинчилээринге хөй чылдарны берген. Барри Керзин өлүмче кирер медитация – «тукдамны» эртем талазы-биле шинчилеп турар хөй эвес санныг эмчилерниң бирээзи. Угаан-медерелин хостап, чок болур медитацияны кылган улуг башкыларны хайгаарап көөрүн ол үш удаа алган.