Тываның Баштыңы ИХЯ-ның удуртулгазынга орук шимчээшкининге хыналданы күштелдирерин сүмелээн

 Регионнуң Баштыңы Шолбан Кара-оол ИХЯ, ОБЯ, Росхереглелхайгааралдың удуртукчулары, чазак кежигүннери, кожуун чагырга даргалары киришкен селектор хуралга ындыг даалганы берген. «Чаа өөредилге чылы эгеледи. Сентябрьда орук шимчээшкини көвүдээр. Уругларның киржилгези-биле озал-ондак болбазын дээш оруктарда байдалды онза чурум-биле хайгаараңар» - деп, Шолбан Кара-оол негээн.

  Республиканың баштыңы эрткен дыштаныр хүнде болган орук-транспорт болуушкунунуң чылдагааннарын сайгарган. 

 «Оруктарда озал-ондактар талазы-биле байдал дыка нарын. Кижилер чок болуп турар. Республиканың девискээринге ОПА-ның стационарлыг пунктуларын ажыдар талазы-биле ажылды дүргедедир херек. ИХЯ чокка шыдаар бис. Боттарывыстың дружинниктеривисти тургузуп, эзирик чолаачыларның машиналарын доктаадыр бис. ИХЯ-ның регионда эргелели стационарлыг постуларны тургузар ужурлуг. Тывага ОПА-ның ийи пунктузун катап тургузуп алзывысса эки. Ооң дугайында Россияның иштики херектер сайыдынга база чугаалаан мен. Ындыг болзажок ИХЯ-дан ОПА-ның стационар пунтуларын тургузары чөптүг эвес деп харыыны болганчок-ла алыр-дыр бис. Ындыг-даа болза Элегес-Аксынга база республиканың барыын уунда Ак деп черге оларны черле тургузар бис. Ол ийи угланыышкында оруктарны эзирик чолаачылардан дуглаар. Бир эвес ол оруктарны дуглаптар болза, эзирик чолаачы кайнаар-даа барбас. Улуг орукту оюп-даа, ажа ужуп-даа шыдавас. Ынчангаш, Кызыл кожуун чагыргазының даргазы Валентин Иванович Ендан, чазак даргазының оралакчызы Артур Маадырович Монгал – ОПА пунктуларын ажылдадыр төлевилелди боттандырар ужурлуг кол албан дужаалдыг кижилер, ону шуптузун кылыр ужурлуг силер. Даалганы күүседиринге бир ай берип тур мен. «Ак» постузу Барыын-Хемчик кожуунда» - деп, Шолбан Кара-оол айыткан.