Тываның Барыын-Хемчик кожуунда асфальт-бетон биче заводун ажыдарынга белеткенип турар

 Республиканың барыын кожууннарының оруктарын хандырарынга чугула херек, амгы үениң асфальт-бетон биче заводунуң шенелдезин чоруткан. Чеди ажылчын олуттуг, шимчеп чоруур комплекстиң бүдүрүкчү күчүзү, ээлчегни4 12 шагында 310 тонна асфальт, а айда бүдүрер асфльт-бетон холуксаазының ниити хемчээли 4800 тонна болур. Төлевилел бюджетче чылда үндүрүг кылдыр 1530 муң рубльди киирип, 3 чылда бодунуң чарыгдалын дуглаптар.

 Республиканың Барыын-Хемчик кожуунда эки ажылдыг Ак-Довурактың ОСТУ бизнес-төлевилелди «Чаңгыс суур – чаңгыс бүдүрүлге» губернатор төлевилели-биле ажылдап кылган. 2013-2014 чылдарда бүдүрүлге ТР-ниң Орук-транспорт яамызының оруктар тударынга 34786,6 муң рубль ниити түңнүг күрүне чагыын күүсеткен. Бо чылын Ак-Довурактың ОСТУ-га күрүне чагыының ниити түңү - 19647,6 муң рублей. 

 2013 чылда-ла бүдүрүлге бодунуң ажыл-чорудулгазын сайзырадыры-биле Ажаалга банкызындан 6,0 млн. рубль чээлини алган. Бүдүрүлге бодунуң 3,0 млн. рубль акша-хөреңгизин каттыштыргаш, 9,434 млн. рубль-биле көжүп чоруур асфальт-бетон заводун садып, тургускан. Бо хүнде биче заводту электроэнергиязында түр када кошкан, шенелде продукцияны үндүрген, «Гудрон» КУБ-биле битум бээр база «Чадаананың ОСТУ» КУБ-биле үүрмектээн сай-даш бээр дугайында керээлер чардынган. 

 Ак-Довурактың ОСТУ-да тургустунган сайгырлыкчы чоруктуң субъектизи - «Прогресс» КХН бүдүрүлгени ам-даа хөгжүдери-биле күрүне деткимчезин алыры-биле конкурсче документилерин дужааган, бир эвес ону алыр болза, электри четкилеринге технологтуг коштунулганы кылыр. Бо чылдың сентябрьда асфальт-бетон биче заводун албан езузу-биле киирер.