Тыва Республиканың Өөредилге болгаш эртем яамызының эгелээшкини-биле бүгү Тывага чоруткан «Тайбыңның көге-бугазы» деп эстафетазы ырак Германияда чеде берген

 Кажан эстафетаны республикага эрттирип турда, кым-даа тайбыңның болгаш буянныг чоруктуң «төлээлекчизи» ындыг ырадыр ужа бээрин бодаваан. Тайбыңның көге-бугазы Хакасияга, Красноярск крайга четкеш, ам Германияның Бидербах деп суурунда барганы онзагай. Чоннар аразының «Хакасия-Германия: найыралдың көвүрүү» деп акциязының дузазы-биле тайбыңның төлээлекчизи даштыкы чуртче аалдап чорупканы ол. 

 Бо акция РФ-тиң камгалал сайыды Сергей Шойгунуң төрээн чурту Тывадан эгелээн дээрзин немец солуннар бижип турар. 2015 чылдың февраль 7-де бо эстафета ТР-ниң өөредилге болгаш эртем сайыды Каадыр-оол Бичелдейниң старты-биле эгелээн. Тайбыңның болгаш буянныг чоруктуң «төлээлекчизи» бүгү Тываны эргээш, 3100 километрни эрткен, аңаа 63 муң кижи киришкен. Бо акцияга Ада-чурттуң Улуг дайынының тиилелгезиниң 70 чыл оюнга тураскааткан 4 муң хире янзы-бүрү хемчеглер база эрткен. 

 Тайбыңның көге-бугазы Тыва Республикадан эгелээш чүгле Красноярск край, Хакасия эвес, Россия биле Германияның чоннарының найыралын база быжыглаан.