Владимир Путин туризм агентилелдериниң чаңгыс аай реестрин тургузарын сүмелээн

 Россияның Президентизи Владимир Путин турисчи агентилелдерниң ажыл-чорудулгазын идегелдиг болгаш көскү болдурарын чедип ап, мөлчүкчү фирмалардан адырлыры чугула деп демдеглээн. Ону чедип алырда турагентилелдерниң чаңгыс аай реестрин тургузар. 

 "Хүннүң айтырыында — туроператорларны каттыштырган хөй-ниити организацияларының бирээзи турагентилелдерниң чаңгыс аай реестрин кылып болур. Ындыг реестр контроль-хыналданы хандырып, технологтуг бүгү чаданы – турисчи продуктунуң бүдүрүлгезинден эгелээш ону садып-саарарынга, турисчи адырның иштинге бедик профессионал негелдени болгаш корпоративтиг стандарттарны салып, хереглекчилерниң мурнунга агентилелдерниң харыысалгазын күштелдирер» - деп, "Россия 24" каналдың эфиринге президент чугаалаан.

 Сервистиң деңнелин доктаамал бедидер деп, Путин айыткан. Ынчангаш делегей негелделеринге дүүштүр турисчи объектилерниң стандартизациязын болгаш сертификациязын уламчылаар херек. Туристерниң эргелерин камгалаарынче онза кичээнгейни углаар. Ылаңгыя бо адырда дыка хөй хажыдыышкыннар бар. Тываның Баштыңы, РФ-тиң Күрчөвүлелиниң кежигүнү Шолбан Кара-оол хуралга киришкеш, Сибирь территориязынга, ооң аразында Тывага, туризм адырын хөгжүдериниң айтырыгларын көдүрген.