Уруглар ойнаар шөлге автомашинага үстүрткен бир харлыг уругнуң байдалын Кадык камгалал яамызы хайгааралда алган

 Ол дугайында чазак даргазының социал айтырыглар талазы-биле оралакчызы Органа Натсак дыңнаткан. 1 хар 1 айлыг уруг 1 дугаар республика эмнелгезиниң реанимация салбырында чыдар. Бичии чашка чогуур эмнээшкинни база реабилитацияны чорударын Тываның кадык камгалал сайыды Орлан Донгакка дааскан. 

 Август тоста Калинин кудумчуда хөй квартиралыг 10 дугаарлыг бажыңның чанынга орук озал-ондаа болган – бичии уруг ойнап турган чуңгуга автомобиль үскен. Кызылдың чурттакчызы, 30 харлыг херээжен «Тойота Runx» маркалыг автомашина-биле демирден кылган чуңгуже халыткан. Ол үеде кырган-авазы бир харлыг уйнуун чуңгуга ойнадып турган. Демир чуңгу ыйлы бээрге, аңаа ойнап турган чаш кээп дүшкен. 

 Ашааның чөпшээрели чокка машина дүлгүүрүн алгаш, бажың чоогунда шөлден халдып үнеп бар чыда, газ биле тормоз педальдарын солуштур базыпканын ол херээжен чолаачы тайылбырлаан. Орук озал-ондаан кылган херээженниң машина башкарар кандыг-даа эргези чок болган. ОШАЧКИ-ниң дыңнадыы-биле алырга, Россияның ИХЯ-ның Истелге эргелелиниң Кызыл хоорайда эргелели хыналданы чорудуп эгелээн.

  Орук шимчээшкининиң айыыл чок чоруу болгаш руль артында кижиниң харыысалгазы дээш калбак тайылбыр ажылын муниципалдыг эрге-чагырга органнары чорудар ужурлуг деп, Чазак Даргазының оралакчызы Орган Натсак демдеглээн. Бо болуушкун ОШАЧКИ-биле ажылды күштелдирерин негеп келген. Аңаа хөй-ниити организацияларының киржилгези, хамаатыларның боттуг туружу негеттинер.