Владислав Сурков Тывага келир чалалганы хүлээп алган

Россия Федерациязының Чазааның Даргазының оралакчызы, РФ-тиң Чазааның аппарадының удуртукчузу Владислав Сурков-биле Тываның Баштыңы Шолбан Кара-оол Москвага март 27-де ужурашкан.
   Тыва биле Россияның чаңгыс демнежилгезиниң 100 чыл байырлалының белеткелинге дорт киржилгези, республиканың чидиг айтырыгларынга кичээнгейи дээш Шолбан Кара-оол өөрүп четтиргенин Владислав Сурковка ужуражыышкын үезинде илереткен. Россияның Президентизиниң Чарлыы-биле федерация чергелиг кылдыр чарлаттынган байырлалга белеткелде чугула айтырыгларны олар сайгарып чугаалашкан. Акшаландырыышкынын Россияның Чазааның деңнелинге дугурушкаш, байырлалга чедир тудуп доозар ужурлуг тудугларже кичээнгейни угландырганнар. Оларның бирээзи Каа-Хем суурга улуг спорт-культура төвү тударын Президент Владимир Путин деткээн Тыва биле Россияның чаңгыс демнежилгезиниң 100 чыл байырлалының программазының кол болуушкуннарын бо төпке эрттирерин планнап турар. Федералдыг яамыларны болгаш албан черлерин байырлалга белеткелге улам чоок хаара тудар хемчеглерин дарый алырының дугайында база Шолбан Кара-оол биле Владислав Сурков чугаалашканнар. Чугула айтырыгларны Россияның Чазааның Даргазының оралакчызының киржилгези-биле шиитпирлээрин олар дугурушканнар.
    Владислав Сурковту республикага бо чылын ажыл-албан аайы-биле аалдап кээринче Тываның Баштыңы чалаарга, ол күзелдии-биле хүлээп алган.