Тыва мөге Опан Саттың Европа чемпионадынга чайынналчак тиилелгези дээш
02.04.2013
Тыва мөге Опан Саттың хостуг хүрешке Европа чемпионадынга чайынналчак тиилелгези-биле Тываның чонунга болгаш республиканың Баштыңынга байыр чедирген телеграмманы Тыва Республиканың Баштыңы Шолбан Кара-оолдуң адынга Россияның Хүреш федерациязының Хүндүлүг президентизи, Красноярск хоорайның Хүндүлүг хамаатызы Дмитрий Миндиашвили чоруткан:
«Хүндүлүг Шолбан Валерьевич! Тбилисиге эрткен хостуг хүрешке Европа чемпионадынга шүглүп, эң күштүүн үш удаа бадыткаан Россияның алдарлыг спорт мастери, силерниң чаңгыс чер-чурттууңар Опан Владимирович Саттың чайыннанчак тиилелгези-биле силерге болгаш акы-дуңма тыва чонга сеткилим ханызындан байыр чедирип тур мен. Россияның төлептиг хамаатызы дээш силерге хууда өөрүп четтиргенимни илереттим. Силерге, силерниң өг-бүлеңерге болгаш Тыва Республиканың шупту чурттакчыларынга кадыкшылды, аас-кежикти, тайбыңны болгаш чаагай чорукту күзедим.
Удавас тыва мөгелерниң бедик Олимпийжи чедиишкиннериниң херечилери апаар боор бис дээрзинге идегээр мен, ол дээрге Тываның чурттакчыларынга кадык овур-хевирлиг чурттаарының үлегери боор».
Март 27-де Опан Сат төрээн Тывазынче чанып келген. Чон ону чүзүн-баазын чечектер, шарлар-биле уткуп ап, «Эр хей, Опан!» деп өөрүп турган.
Возврат к списку
|