Тыва комиссарның 100 хары

1941-1945 чылдарда Ада-чурттуң Улуг дайынынга немец-фашизмге удур тулушкан Тыва эки турачы аъттыг эскадроннуң комиссары Монгуш Данзынович Байысклаңның 2013 чылдың апрель 1-де 100 хары.
    Аңаа тураскааткан ужуражыышкынны бөгүн, март 28-те, Пушкин аттыг национал библиотеканың национал болгаш чурт-шинчилел литература килдизиниң ажылдакчылары эрттирер. Килдистиң ажылдакчылары Любовь Чадамба, Чечек Монгуш, Елена Ак-кыс олар ужуражыышкынның киржикчилери Кызыл хоорайның уран чүүл колледжизиниң сургуулдарын тыва эки турачы аъттыг эскадрон, ооң комиссары Монгуш Байысклаң дугайында литература болгаш чечен чогаал номнары-биле таныштырар.
   Тыва эки турачы аъттыг эскадроннуң дайынчыларының уруг-дарыы база ужуражыышкынга чалаттырган. «Тыва эки турачыларның салгалы» хөй-ниити организацияның удуртукчузу, «Эки турачы аъттыг эскадрон» деп номнуң автору, эскадроннуң дайынчызы Михаил Сундуйнуң оглу Алексей Сундуй, эскадроннуң комиссары Монгуш Байысклаңның уруу, филология эртемнериниң доктору Светлана Монгушевна Орус-оол, эскадроннуң дайынчызы Борис Конгарның оглу Алексей Конгар ужуражыышкынга кээр. Немец-фашизмден тайбың амыдыралды камгалаан эрес-дидим дайынчылар бооп, чоннуң угаан-медерелинге артып каан адалары кандыг кижилер чораанын олар аныяктарга сактып чугаалап бээр.
    2013 чыл — Тываның төөгүзүнге, тыва эки турачыларның салгалынга онзагай чыл. Бо чылын тыва эки турачыларның фронтуже аъттанганының 70 чылы, оларның комиссарының 100 хары.