Чайгы дыштанылга лагеринге хораннанган уругларның байдалының дугайында билип алыры-биле республиканың халдавырлыг аарыглар эмнелгезинде «изиг харылзаа» шугумун ажыткан

Уругларның канчап хораннанганын тодарадыры-биле ТР-ниң Чазааның Даргазының социал айтырыглар талазы-биле оралакчызы Органа Натсак дүүн Таңды кожууннуң девискээринде «Орленок» уруглар лагеринге четкен.

Ооң чугаазы-биле алырга, лагерьде дыштанып турар 179 уругнуң 28-зи аараан. «Ижинниң халдавыры» диагнозтуг ортумак берге байдалдыг 20 уругну Бай-Хаак суурда база республиканың халдавырлыг аарыглар эмнелгелеринде чыттырган. Чүгээр байдалдыг 8 уругну ада-иелер боттарының хайгааралынче алган. Республиканың халдавырлыг аарыглар эмнелгезинде 8(39422) 6-40-60; 6-38-47 дугаарлыг телефоннарлыг «изиг шугум» ажыттынган.

«Лагерьни бүрүнү-биле хынап турар. Мында санавиация ажылдакчылары, кожууннуң төп эмнелгезиниң эмчилери, кадык камгалал сайыды ажылдап турарлар. Росхереглелхайгааралының төлээлери эпидемиологтуг истелгени эгелей берген. Анализтерниң түңнели дүне үш шакта билдине бээр. Оон хораннаныышкынның чылдагаанын тодарадып, баштайгы чогуур түңнелдерни үндүрүп болур» - деп Органа Натсак чугаалаан.

Оралакчы дарга лагерьниң шупту документилерин хынап көргеш, «Орленок» лагери ажылын эгелээри-биле хыналда-хайгаарал органнарындан, ооң аразында Росхереглелхайгааралдан, шупту эргежок документилерни алганын демдеглээн. Столоваяның кухнязы, лагерь бүрүнү-биле эки байдалда дээрзи көскү.

«Хораннаныышкынның чылдагааны чүү болганын Росхереглелхайгааралының хыналдазы тодарадып кээр. Оон аңгыда мында эрге-хоойлу органнарының төлээлери база ажылдап турар. Республиканың Баштыңы лагерьде уруглар хораннанган факт-барымдааның бүгү материалдарын республиканың истелге органнарынче дамчыдар даалганы берген» - деп О. Натсак дыңнаткан.