Доозукчулар кежээлерин организастыг эрттирери-биле Тываның школаларынга чазак даргазының оралакчыларын, сайыттарны, ведомстволарның удуртукчуларын быжыглаан
16.06.2015
Тываның Чазааның айтыышкыны езугаар доозукчулар кежээлерин организастыг эрттирери-биле Тываның школаларынга хайгаарал-хыналданы тудар кылдыр чазак даргазының оралакчыларын, сайыттарны, ведомстволарның удуртукчуларын быжыглаан. Июнь 27-де, доозукчулар кежээзиниң хүнүнде, тус чер чагыргаларының ажылдакчылары, башкылар болгаш ада-иелер-биле олар хондур хайгааралды чорударлар. Оон аңгыда ол хүнде арага аймаан садарын кызыгаарлаан, хемнерниң деңнелиниң көдүрлүп, арга-арыг өрттери болуп турарындан база саргы көвүдээнинден бойдусче агаарлап үнерин база хораан.
Күрүне чагыы-биле дээди өөредилге черлеринде болгаш училищелерде тускайлаттынган тускай сорулгалыг керээ-биле өөренир олуттар талазы-биле информастыг тайылбыр ажылын доозукчулар ортузунга чорударын ТР-ниң Чазаа дааскан. Тываның Баштыңының «ог-бүле бүрүзүнге бирден эвээш эвес дээди эртемниг уруг» деп губернатор төлевилелиниң негелдези-биле өөренир уругларга тускай мергежил шилип алырынга боттуг дузаны кадарын база айыткан.
Ол хүн республиканың полиция ажылдакчылары хүн чурумун күштелдирип, корум-чурумну хандырарын база айыткан. Тываның Баштыңының өөредилге талазы-биле харыылап турар оралакчызы Органа Натсакка доозукчулар кежээзиниң кандыг байдалга эрткениниң дугайында дыңнадыгны июнь 30-ке чедир киирер.
Возврат к списку
|