Тывада «Кадыкшылдың маршруду» төлевилелдиң боттаныышкыны уламчылавышаан

Кардиолог, офтальмолог, эндокринолог, невролог, УЗД талазы-биле эмчи база рентгенлаборант дээш тускай эртемниг эмчилерден тургустунган Кызылдан көжүп чоруур бригада бо удаада +вүр кожууннуң чурттакчыларын ийи хүннүң дургузунда хүлээп ап, ханы шинчилгени эрттирген. Найысылал Кызылче чоруп турбайн, төптен келген эмчилерге амгы үениң бедик технологтуг дериг-херекселинге шинчидип алыр арганы кожууннуң 614 чурттакчылары алган.

Кардиолог эмчи 83 кижини шинчээн, оларның 73-үнүң ханының базыышкыны улуг, 14-үнүң чүрээниң шыңганнары аарыг болган. Ийи кижиниң чүрээ кемниг база бир кижи төрүмелинден чүрээ аарыг дээрзи тодараттынган.

Эмчи хүлээп алыышкынынга кирген херээженнерниң хөй кезии семиир аарыгдан халажырап чорууру илереттинген. Эндокринологка 121 кижи шинчиткен, оларның 48-зинге «кадык» деп түңнелди берген. Чигир аарыының бирги чадазы-биле аараан 1, ийиги чадазында 12 кижини илереткен. Эмиг бестеринге маммографияны 68 херээжен эрткен. Шинчилгениң түңнели-биле аарыг кижилерге эмнээшкин талазы-биле арга-сүмени эмчилер берген.

Тываның Баштыңының эгелекчи саналы-биле «Кадыкшылдың маршруду» губернатор төлевилели 2014 чылдан бээр чурттакчы чоннуң кадыкшыл байдалын шинчип хынаары-биле республиканың кожууннарже үнүүшкүннерни чорудуп, тус черниң эмнелге албан черлеринде эмчилеринге организастыг-методиктиг дузаны чедирип турарын сагындыраал.