Көшкеге бастырган оолдарның аттарын мөңгежидери - биле…

Шолбан Кара-оол республиканың Өөредилге болгаш эртем яамызының, а ол ышкаш Мугур-Аксы суурнуң школазының удуртулгазынга хар көшкезинге бастыргаш, амы-тынындан чарылган школачыларның чырык адын мөңгежидери-биле эрттирер хемчеглерни өөренип көөрүн саналдаан.
   «Оларның спортчу болгаш чогаадыкчы ажыл-чорудулгазының дугайында булуң-даа болуп болгай. Чок-ла болза, сактыышкын кичээлдери. Амы-тынындан чарылган алды оол шуптузу оларны онзалап демдеглээринге төлептиглер. Оларның кижи бүрүзү бир онза кижи кылдыр билдингир болгаш, халап-биле үзүлген, кыска-даа болза, чуртталгазында эвээш эвес чедиишкиннерни чедип алган» — деп, ол демдеглээн. 
     Сактыышкын кичээлдерин кажыыдал хевирлиг кылдыр эвес, а айыыл чок чоруктуң дүрүмнерин сагыыр дугайында сагындырыг кылдыр эрттирер ужурлуг деп, Шолбан Кара-оол санаан. Мөңгүн-Тайгага болган айыыл-халап оолдарның үе-черге эш-өөрүнге быжыг найыралдың бадыткалын, бот-боттарын деткижерин, чуртунга ханы бердинген болурунга, чуртталганы оон-даа эки болгаш каас-чараш кылырынче чүткүлдүүнүң база оон-даа өске чугула чүүлдерниң дугайында сайгарып чугаалажырынга чылдагаан база болур дээрзин ол айыткан. 
     Сөөлгү тывылган оол Аяс Салчак «Салгал» деп уругларның хөй-ниини организациязын удуртуп турган. 
Белек Оюн школа чазааның культура сайыды болбушаан, кызыгааржыларга база дузалажып турган. Ооң эжи Борбай-оол Хертек чуруттунарынга ынак болгаш хостуг хүрешче барып турган. Багай-оол Самыя кожууннуң салым-чаяанныг уругларының бирээзи болуп, кикбоксинг секциязынче барып, «Полицияның аныяк өңнүү» деп бөлүкче кирип турган. Хөндергейниң коррекциялыг школа-интернадының кижизидикчизи Мөңгүн-Херел Кара-Салдың сонуургалы хөй талалыг боорда, хостуг хүреш, танцы болгаш даараныр бөлгүмнерже улуг сонуургал-биле барып турган. Мугур-Аксының № 1 школазының доозукчузу Буян Сааяны бот-тывынгыр уран чүүлдүң идепкейлиг киржикчизи деп, шупту билирлер. Ол кожууннуң Культура бажыңының ыры-хөгжүм ансамблиниң кежигүнү турган.

Чурукту Виталий Шайфулин тырттырган