26.11.2014
Бүрен-Хем суурга ооң мурнунда уруглар сады янзы-бүрү чылдагааннар-биле 1994 чылда дүжүп, хөй чылдарда октаттынган турган. Октаттынган садты катап септээринге күрүне 29 млн. рубльди үндүргеш, септээш, ажыглалче кииргени — улуг өөрүшкү. Садиктиң катап ажыттынганы-биле Ш.В.Кара-оол бодунуң чаңгыс чер-чурттугларынга байыр чедиргеш, чедиишкиннерни күзеди.
Хүндүлүг аалчы Шолбан Кара-оол, уруглар садының эргелекчизи Алена Куулар, ада-иелер чөвүлелиниң даргазы Марта Мадар-оол, ол садикке турар дээн бичии Тимур олар кызыл кожааны кезип, чаа «Хүнчү-геш» уруглар садының эжиин ажыдып киргеннер.
Тываның Баштыңы ооң соонда Сарыг-Сеп суурда 140 олуттуг чаа туттунган «Теремок» уруглар садының ажыдыышкынынга киржип, өөрүшкүзүн үлежип, улуг-улуг чедиишкиннерни күзээш, чаа уруглар «ордузунче» кирген.
Чаа сад турар черге ооң мурнунда 60 олуттуг бичии уруглар сады турган. Тудуг үе-зинде школаның эге класстар өөренип турган бажыңынга бичии чаштар сады турганын, чаа садта олуттарның чедишпес болганы-биле эге школа турган бажыңны сад хевээр арттырарын Сарыг-Сеп суурнуң чурттакчызы чугаалады.
Ол-ла хүн Тываның Баштыңы чүгле ажыдыышкынга эвес, а Кундустуг суурда 2014 чылдың ноябрь 3-те туттунуп эгелей берген уруглар садының тудуунга чедип, ооң эргелекчизи болгаш тудугжулар-биле ужуражып, чугаалашкан. Уруглар садының тудуунга 106 млн. рубль көрдүнген. 14 айның иштинде тудугну доозуп, ажыглалче киирерин планнап турар. Эштир бассейниг, чаа садка 140 уруглар турар.
Кожууннуң хөгжүлдезинге улуг идигни бергени дээш Тываның Баштыңы Ш.В.Кара-оолга болгаш келген сайыттарга Каа-Хем кожуун чагыргазының даргазы А.Х.Чалан-оол чонунуң өмүнээзинден өөрүп четтиргенин илереткен.
Ш.В Кара-оол кижизидикчи башкыларже улуг кичээнгейни угландырып, оларның ажылы чаш ажы-төлдүң келир үезинге чугула черни ээлеп турарын кайы-даа суурга баргаш, катап-катап сагындырды. Башкы кижи боду өөренмейн баар чүве болза, ол башкы болуп шыдавазының дугайында чугаалааш, үениң негелдези-биле төлептиг башкылар болурун Тываның Баштыңы Шолбан Кара-оол күзээн.
Айдың Ондар.
Виталий Шайфулинниң тырттырган чуруктары.