База катап М-54-түң айтырыы
24.10.2014
Тываның Баштыңы Шолбан Кара-оол «Кызыл — Чадаана —Хандагайты — Боршоо» автомобиль оруун дамчыдарының айтырыын федералдыг деңнелге шиитпирлээрин уламчылап турар.
Шолбан Кара-оол амгы үеде Москвада республиканың айтырыгларын шиитпирлеп чоруп тура, ол Россияның Транспорт яамызынга болгаш Росавтоорукка база чедип, ажылчын чугаалажыышкыннарны кылган. Айтырыгның кол утказы - «Кызыл — Чадаана — Хандагайты — Боршоо» автомобиль оруун (Моол-биле кызыгаарга чедир) федералдыг деңнелче дамчыдары болуп турар.
Ол Росавтооруктуң удуртулгазы-биле чаңгыс эвес удаа ужуражылганы эрттирген, чугула ажыл-херектерни чугаалашкан. М-54 федералдыг орукту республиканың мурнуу чүгүнден барыын чүкче өскертириниң айтырыын Тываның Баштыңы 2011 чылдан бээр көдүрүп келген дээрзин сагындыраал. Ооң ол эгелээшкинин Россияның Президентизи Владимир Путин, РФ-тиң транспорт сайыды Максим Соколов деткээн.
Оруктуң чаа угланыышкыны Россия — Моол кызыгаарга хөй талалыг эрттирилгени тургузарын дүргедедир болгаш Европа биле Азияның аразынга транспорт аргыштырылгазын Тываны дамчыштыр эрттиреринге байдалдарны тургузар ужурлуг. Оон аңгыда М-54 маршрут республиканың чурттакчыларының 60 хуузу чурттап турар девискээрлерни дамчып эртер болгаш ында амыдыралды шынар талазы-биле экижидери чугаажок. Ол төлевилелди камгалап тура, Шолбан Кара-оол барыын угланыышкында автомобиль оруктарының баксырап турарын, ооң уламындан орук-транспорт озал-ондааның көвүдеп турарын каш удаа айтып келген. Бо айтырыгны сайгарып көөр кылдыр чоокку үеде РФ-тиң Чазаанче киирер.
Ол ышкаш республиканың удуртукчузу Россияның Саң-хөө яамызынга ужуражылгаларны эрттирген. Ооң соонда Новосибирскиге кээр, октябрь 22-де Президентиниң Сибирьниң федералдыг округунда Бүрүн эргелиг төлээниң чанында чөвүлелдиң болгаш регионнар аразының «Сибирь дугуржулгазы» ассоциациязының чөвүлелиниң кады эрттирген хуралынга киришкен. Хурал үезинде Новосибирскиге Сибирьниң агроүлетпүр комплекизиниң сайзыралының перспективаларын сайгарар, аңаа көдээ ажыл-агый продукциязын киир сөөртүр чорукту кызыгаарлаарын болгаш иштики курлавырларны көвүдедирин барымдаалаар.
Возврат к списку
|