Хамыкты кайгаткан тыва театр

Москвада Тываның культура хүннери

Москвада Тываның культура хүннерин таварыштыр Тыва биле Россияның демнежилгезиниң 100 чылынга тураскааткан В.Көк-оол аттыг Национал театрның оюн-көргүзүү  Россияның Аныяктарның академиктиг театрынга эрткен субботада, сентябрьның 20-де, болуп эрткен.

Баштайгы хүнде бистиң театрның артистери ат-сураглыг «Кым сен, Сүбедей Маадыр?» деп шиизин москвачыларга болгаш ында чурттап турар чаңгыс чер-чурттугларынга  бараалгаткан. Шиини Тываның Улустуң чогаалчызы Эдуард Мижит бижээн, тургускан режиссеру – Тываның Улустуң артизи Алексей Ооржак, чурукчузу – Тыва Республиканың алдарлыг чурукчузу Валерий Шульга. Көрүкчүлер залга хостуг олут чок кылдыр чыылган. Артистерниң оюну, кайгамчык бедик утка-шынарыг шии хамыкты кайгаткан.

Театрның фойезинге тываларның эдилеп чораан эдилелдериниң болгаш сагып чораан езу-чаңчылдарынга хамаарышкан делгелге хөйнү сонуургаткан. Ол делгелгени республиканың Алдан-Маадыр аттыг Национал музейи организастаан. Фото-чуруктар каастаан делгелгеге тыва хөгжүмчүлер, оларның аразында В.Көк-оол аттыг Национал хөгжүм-шии театрының артистери чыылганга аян тудуп ойнаан.

Шии эгелээриниң бетинде Россияның Аныяктарның академиктиг театрының директору Владислав Любый бодунуң театры­ның сценазында оюн-көргүзүүн бараалгадып келген тыва коллегаларынга байыр чедирип сөс алган. Москвачыларга, чыылган көрүкчүлерге болгаш чаңгыс чер-чурттугларынга  Россия биле Тываның демнежилгезиниң 100 чылы-биле Тыва Республиканың Баштыңы Ш.В.Кара-оолдуң  байыр чедириишкинин ТР-ниң Москвада Төлээ чериниң бүрүн эргелиг төлээзиниң оралакчызы Светлана Намчак номчаан. Оон аңгыда ТР-ниң культура сайыдының оралакчызы Алдар Тамдын база В.Көк-оол аттыг Национал хөгжүм-шии театрының директору Станислав Ирил олар көрүкчүлерге байыр чедиргеш, москвачы коллегаларынга тыва хамның дүңгүрүн белекке сөңнээн.  Көрүкчүлерниң аразында Москвада чурттап чоруур тывалар, студентилер, чурттуң өске регионнарында чурттап чоруур тывалар, аңгы-аңгы хоорайлардан чаңгыс чер-чурттугларның төлээлери хөй болган. А Подмосковьеде шериг кезээнден удуртулгазы-биле тускай дугуржулга езугаар шериг хүлээлгезин эрттирип турар 40 солдат чаңгыс чер-чурттугларының оюн-көргүзүүн көөр аас-кежиктиг болган.

Сентябрь 21-де тыва театр «Эгил, эжим, эгил!» деп шиизин бараалгаткан.

Москвада Тываның культура хүннеринде Бүгү-российжи музейде улусчу ус-шеверлерниң кылыгларының «Тыва үелерниң маңында» деп делгелгези ажыттынган. Ооң байырлыг ажыдыышкыны сентябрь 15-те болган. Аңаа Орус географтыг ниитилелдиң президентизи, Россияның камгалал сайыды Сергей Шойгу, РФ-тиң ФХ-ниң Федерация Чөвүлелиниң даргазы Валентина Матвиенко база РФ-тиң культура сайыды Владимир Мединский олар киришкен.

Москвада Тываның Төлээ чериниң медээзи-биле.