Тываның Кадык камгалал яамызы республиканың чурттакчы чонунуң кадыының дугайында күрүне илеткелин таныштырган

Тываның кадык камгалал сайыды Анатолий Югай 2023 чылда регионнуң чурттакчы чонунуң кадыкшыл байдалының дугайында күрүне илеткелин Тыва Республиканың Чазааның хуралынга таныштырган. Республиканың чурттакчы чонунуң ниити аарыырының көргүзүү сөөлгү беш чылда 4,5 хууза эвээжеп, Россияда база СФО ортумак көргүзүгден тус-тузунда 35,6 база 39,3 хуу эвээш бооп артканын ведомствонуң сан-чурагайында айыттынган. Тываның Баштыңы Владислав Ховалыг бо чылды республикада Кадыкшыл чылы кылдыр чарлаанын ол онзалап демдеглээн.

Статистикадан көөрге, республиканың чурттакчы чону тыныш органнарындан хөй аарып турар. Ийиги черде – хан-дамыр эргилдезиниң аарыглары, үшкү черде – кемдээшкиннер база хораннаныышкыннар, ооң соонда – бес системазының база чем хайылдырар органнар аарыглары колдаан. Сайыт аарыыр чорукту эвээжедир дээш регионнуң ап чоруткан хемчеглериниң дугайында сагындырган.

Эрткен чылдың төнчүзүнде республикага РФ-тиң камгалал сайыды Михаил Мурашко кээп чорааш, чурттакчы чон ортузунга диспансеризацияны база шинчилгелерни эрттирери чугула дээрзин айыткан. Федералдыг сайыттың база Тываның Баштыңының кады эрттирген хуралының түңнелинде тургускан даалгалар езугаар, регионалдыг профилактика программаларының хемчеглерин боттандырып, телемедицина консультацияларын эрттирип, кадыкшыл болгаш патронаж школалары ажылдап турар.

Алдынган күжениишкиннерниң ачызында, ооң мурнунда өске регионнарже чорупкан турган 75 эмчи эрткен чылын республикаже чанып келген. 46 эмчи Кызылдың эмнелге организацияларынга, 29-зу кожууннарда ажыл-биле хандыртынган. Өске регионнарда ээп келген эмчилерниң көвей кезии республиканың 1 дугаар эмнелгезинде база Диагностика төвүнде ажылдап турар.

Эмчи ажылдакчыларынга социал деткимче хемчеглери-биле 24 кижиниң чуртталга байдалын экижиткен, көдээ черлерде 1073 эмчи ажылдакчыларынга чуртталга-коммунал ачы-дузаларының чарыгдалдарынга компенсацияны төлээн, эмчилерниң 56 ажы-төлүнге уруглар садтарынче олуттарны ээлчег чокка берген.

Республикада кадык камгалал адырының материал-техниктиг баазазы элээн быжыглаттынган – эрткен чылын 7 ФАП-ты база бир эмнелге амбулаториязын туткан. 119 санныг эмнелге дериг-херекселдерин база 10 санныг автотранспортту саткан. Республиканың уруглар эмнелгезиниң чаа оран-савазының төлевилел-смета документилерин кылыры доозулган.