Тывада биче судноларга аай-дедир эжиндириишкин сезону ажыттынган

Майның 15-тен эгелеп Улуг-Хемнеп база ооң адырларынга биче хемчээлдиг суднолар-биле эжиндирерин чөпшээрээн. Республика Баштыңы Владислав Ховалыг ооң дугайында айтыышкынга атты салган. Регионга суднолар эжиндиришкини октябрь 15-ке чедир уламчылаар.

Республикада пассажир флоду чок болганындан, ол айтыышкын биче хемчээлдиг суднолар ээлеринге хамааржыр. Бо хүннүү-биле алырга, Тывада моторлуг база, 2,8 муң хеме бар. Оон аңгыда сезон ажыттынарга, дөрт хире паром база ажылын эгелээр.

- Тус чер чагыргалары боттарының шиитпирлери-биле хүннерин таарыштып болур. Сугга айыыл-халаптар болдурбазы - эң чугула. Харыысалгалыг албаннар суг объектилериниң эрик зоназынга патрульдаашкынны организастаарын дилеп тур мен – деп, Владислав Ховалыг эжиндириишкинниң эгелээнин дыңнадып тура, чугаалаан.

Амгы үеде Россияның ОБЯ-зының Тыва Республиканың Кол эргелелиниң күрүнениң биче хемчээлдиг суднолар инспекциязының ажылдакчылары ГИМС учедунда турар биче хемчээлдиг судноларны хынап турар.

Майның эгезинде, Тываның суг объектилеринге биче хемчээлдиг судноларны ажыглаарының дүрүмнерин хажыдарын болдурбазынче угланган патрульдаашкын база рейдилер чорудар күрүнениң биче хемчээлдиг суднолар инспекциязының суднолары беленин хынаан.